Нийгэм
"Оюу толгой"-н далд уурхайн бүтээн байгуулалт, санхүүжилтийн төлөвлөгөөнд аудит орууллаа
Огноо: 5-14
Нийтлэгч: read.mn

Үндэсний аудитын газраас (ҮАГ) “Оюу толгойн далд уурхайн бүтээн байгуулалт, санхүүжилтийн төлөвлөгөө”-нд хийх аудитын нээлтийн үйл ажиллагаг өнгөрсөн Баасан гарагт хийсэн байна. 

Энэ үеэр Монгол Улсын Ерөнхий Аудитор Д.Хүрэлбаатар, МУЕА-ын зөвлөх А.Энхбат, ҮАГ-ын Чанарын баталгаажуулалтын албаны дарга Ц.Батбаяр, Нийцлийн аудитын газрын захирал С.Энхбаатар нар  “Оюутолгой” ХХК-ийн удирдлагад аудитын  төлөвлөгөө болон аудитыг гүйцэтгэх багийн бүрэлдэхүүнийг танилцуулжээ. 

Тус арга хэмжээнд “Оюутолгой” ХХК-ийн гүйцэтгэх захирал Армандо Торрес, Хуулийн газрын захирал Д.Амарбаясгалан, Хамтын ажиллагаа хариуцсан ахлах зөвлөх н.Өсөхбаяр, Ерөнхий нягтлан бодогч Р.Бадамханд, Санхүүгийн шинжээч А.Мөнхцэцэг зэрэг албаны хүмүүс оролцсон талаар ҮАГ мэдээлжээ. 

 

Үндэсний аудитын газар нь Төрийн аудитын тухай хуулийн дагуу:

“Оюу толгойн далд уурхайн бүтээн байгуулалт, санхүүжилтийн төлөвлөгөө”
“Оюу толгой төслийн нэг болон хоёр дахь шатны хөрөнгө оруулалтын гүйцэтгэл, хувь эзэмшигчид ногдох хөрөнгө оруулалтын болон хөрөнгө оруулалтад зориулж авсан зээлийн тооцоо, ирээдүйд төлөгдөх өр төлбөрийн байдал” гэсэн 2 бүлэг сэдвээр 2018-2019 оныг дамжин аудитыг гүйцэтгэх юм байна. 

Олон улсын стандартад “Аудитын дээд байгууллагууд хараат бус байдлаа бууруулахгүйгээр олон нийтийн хүсэн хүлээлт буюу, таамаглалыг мэдэж авч, түүнд цагаа олсон, тохиромжтой хариултыг өгч байх хэрэгтэй” гэж заасны дагуу мэргэжлийн зөвлөх, шинжээч, инженер, техникийн багуудтай хамтран бодит мэдээлэл, баталгаат баримт бичигт тулгуурлан тус аудитуудыг хууль, эрх зүйн хүрээнд гүйцэтгэж дүгнэлт гарган, олон нийтийг үнэн зөв мэдээллээр хангах үүргийг гол зарчим болгон ажиллахаа МУЕА Д.Хүрэлбаатар илэрхийлжээ. 

“Оюутолгой” ХХК-ийн гүйцэтгэх захирал Армандо Торрес аудитын үйл ажиллагаанд дэмжлэг үзүүлж, хамтран ажиллана гэдгээ энэ үеэр мэдэгдсэн байна. 

Сэтгэгдэл байхгүй байна

Сурталчилгаа