Эрүүл мэнд
Монголдоо эмчилнэ
Огноо: 2 сарын 13
Нийтлэгч: Цэвээнгэрэл

Гадаад улсад эмчилгээ хийлгэсэн иргэдийн сүүлийн хоёр жилийн  судалгаанаас харахад эрхтэн шилжүүлэн суулгах, зүрх судасны мэс засал, мэдрэлийн мэс заслын шалтгааны улмаас нийт 198 иргэн гадаад улсад эмчилгээнд хамрагдан, 11 тэрбум 398 сая 400 мянган төгрөгийг зарцуулжээ. Дээрх гурван өвчний улмаас эмчилгээнд хамрагдсан иргэд нийт эмчилгээнд хамрагдсан иргэдийн 71,2%-ийг эзэлж, нийт гадаад улсад эмчилгээнд гарсан мөнгөний 68,9%-ийг эзэлж байна. Харин гадаад улсад эмчлүүлж байсан 39 төрлийн өвчнөөс долоон өвчнийг эх орондоо эмчилдэг боллоо. Үүнд :

1.Гүрээний ба нурууны артерийн нарийсал, бөглөрлийн үеийн мэс засал,

2.Дунд тархи багана бүтцийн байрлалтай мальформац,

3.Зүрхний хэм алдалтын үеийн эмчилгээ болох абляци,

4.Улаан хоолой, цагаан мөгөөрсөн хоолойн фистул,

5.Ходоод гэдэсний хавдрын үеийн хими эмчилгээ

6.Түлэгдлийн улмаас үүссэн талбай ихтэй соривын эмчилгээ,

7.Өндгөвчний төрөлхийн дутуу хөгжил болон эрэгтэйчүүдийн үрийн сувгийн эмгэгээс үүдсэн үргүйдлийн эмчилгээ багтаж байна

Тодруулбал  мэдрэлийн мэс заслын хоёр, зүрхний мэс заслын нэг, хавдрын хавдрын хоёр,  гэмтлийн нэг, үргүйдлийн хоёр өвчнийг эх орондоо эмчилдэг болсон. 2016 оны 7 дугаар сараас хойш Зүрхний хэм алдалтын үеийн эмчилгээ болох абляци эмчилгээг давхардсан тоогоор 100 гаруй хүн, тархины судсан дотуурх мэс заслын эмчилгээг 414 хүн эх орондоо хийлгэжээ.

Зүрхний хэм алдалтын эмчилгээг зүүн өмнөд Азийн орнуудад 8000-20000 ам доллар, тархины судсан дотуурх мэс заслын эмчилгээг доод тал нь 50000 доллар төлдөг. Энэ нь зөвхөн эмчилгээний зардал юм. Үүн дээр хамт яваа хүний онгоц, хоол унаа, амьдралын зардал нэмэгддэг.

Ингэж бодохоор гадаадад эмчилгээ хийлгэх нь иргэнд маш их санхүүгийн хүндрэл үүсгэдэг нь харагдаж байна. Уг эмчилгээг эх орондоо хийдэг болсноор зүрхний хэм алдалтын үеийн абляци эмчилгээний зардлаас 10-13 сая төгрөгийг эрүүл мэндийн даатгалаар хөнгөлөгдөн иргэн 5-6 сая төгрөг төлж,  өндөр өртөгтэй мэс засал болох тархины судсан дотуурх мэс заслын эмчилгээний зардлаас  дээд тал нь 60-70 сая, багадаа 8-10 сая төгрөгийг эрүүл мэндийн даатгалаар хөнгөлөгдөн иргэн 10-3 сая төгрөг төлж эх орондоо эмчилгээнд хамрагдах бүрэн боломж бүрдлээ.

Энэ мэтчилэн гадаадад эмчилэгдэж байсан найман өвчнийг эх орондоо эмчилж байна. Дашрамд сонирхуулахад зайлшгүй шаардлагаар гадаадад руу эмчлүүлсэн нийт иргэдийг явсан улсаар нь хувааж ангилж үзэхэд  БНСУ-д 41.3хувь,  БНЭУ-д 26.9 хувь,  БНХАУ-19 хувь тус тус эмчилгээ хийлгэсэн байна.

Сурталчилгаа
Санал болгох